تقدر تعترف؟
بروفيسور/ نعمات الزبير
همسة خاطر لترميم جسور المودة وإعادة التواصل..
خلّي عندك شجاعة تعترف:
إنه في وقت ما في قصة ما
في قصص
كنت أنت فيها الأذى!؟
مش الأذى الـ”وقع عليك”.
في مواقف..
خذلت، جرحت، ضغطت، سيطرت، أو سكتت عن حق زول؟
وكل ده ليه أثر، حتى لو كنت شايفو “عادي” وقتها.
الوعي الحقيقي مش إنك تفضل شايف نفسك ضحية!
الوعي الحقيقي إنك تقيف مع نفسك وتسأل:
أنا وين كنت غلط؟
أنا كيف آذيت زول؟
أنا ليه اخترت نفسي بطريقة جرحت غيري؟
مش جلد ذات..
دي شجاعة.
إنك تعترف إنك بشر،
وإن الخطأ جزء منك..
ده ما ضعف، ده بداية النضج.
وأصعب اعتراف ما بس إنك تقول “اتأذيت”..
أصعب اعتراف إنك تقول:
“أنا كمان آذيت.”
ساعتها بس..
تبدأ تتغير بجد،
وتبقى أرحم بنفسك وبغيرك.
فـ سؤال مهم:
تقدر تعترف؟ ولا لسه متمسك بدور الضحية؟
قادر تقولها؟.
